സ്റ്റേറ്റ് ബാങ്ക് ഓഫ് ഇന്ത്യ 2416 കോടിയുടെ നഷ്ടത്തിലെന്ന് കണക്കുകള്‍

 


ന്യൂഡല്‍ഹി: രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ കനത്ത നഷ്ടത്തിലെന്ന് കണക്കുകള്‍. 2017-18 സാമ്പത്തിക വര്‍ഷത്തിലെ മൂന്നാം പാദത്തില്‍ (ഒക്ടോബര്‍-ഡിസംബര്‍) 2416 കോടിയുടെ നഷ്ടമാണ് രേഖപ്പെടുത്തിയിരിക്കുന്നത്.

മൂന്നാം പാദത്തിലെ പലിശ വരുമാനം 18,687.52 കോടിയാണ്. ഇത് നേരത്തെയുണ്ടായിരുന്ന വരുമാനത്തെ അപേക്ഷിച്ച് 5.17 ശതമാനം വര്‍ദ്ധിച്ചിട്ടുണ്ട്. 26.51 ലക്ഷം കോടിയുടെ നിക്ഷേപങ്ങളുണ്ടായി. ചെറുകിട വായ്പകള്‍ 13.59 ശതമാനവും കാര്‍ഷിക ലോണുകളില്‍ 5.88 ശതമാനവും വര്‍ദ്ധനവ് രേഖപ്പെടുത്തി. അതേസമയം കിട്ടാക്കടം വന്‍തോതില്‍ പെരുകുന്നതാണ് ഇത്ര വലിയ നഷ്ടത്തിന് കാരണമാകുന്നത്.

2016-17 സാമ്പത്തിക വര്‍ഷത്തിലെ മൂന്നാം പാദത്തില്‍ 2610 കോടിയായിരുന്നു എസ്.ബി.ഐയുടെ ലാഭം. ഇതാണ് 2416 കോടി നഷ്ടത്തിലേയ്ക്ക്‌ കൂപ്പുകുത്തിയത്. കടപ്പത്രങ്ങളുടെ പലിശച്ചെലവ് കൂടിയതാണ് നഷ്ടത്തിന് കാരണമായതെന്ന് എസ്.ബി.ഐ ചെയര്‍മാന്‍ രജനീഷ് കുമാര്‍ പറഞ്ഞു.