പിന്‍സീറ്റ് യാത്രക്കാര്‍ക്ക് ഹെല്‍മെറ്റും സീറ്റ് ബെല്‍റ്റും ഉടന്‍ നിര്‍ബന്ധമാക്കില്ല

ഇരുചക്ര വാഹനങ്ങളിലെ പിന്‍സീറ്റ് യാത്രികര്‍ക്ക് ഹെല്‍മറ്റും, കാറിലെ പിന്‍സീറ്റുകാര്‍ക്ക് സീറ്റ് ബെല്‍റ്റും നിര്‍ബന്ധമാക്കുന്ന നടപടി ഉടനില്ലെന്ന് ഗതാഗതവകുപ്പ്. ആദ്യം ബോധവത്കരണം നടത്താനാണ് സര്‍ക്കാര്‍ തീരുമാനിച്ചിരിക്കുന്നത്.

പിന്‍സീറ്റ് യാത്രക്കാര്‍ക്ക് ഹെല്‍മെറ്റും സീറ്റ് ബെല്‍റ്റും നിര്‍ബന്ധമാക്കണമെന്ന് ആവശ്യപ്പെട്ട് ഗതാഗത സെക്രട്ടറി കഴിഞ്ഞ ദിവസം ഗതാഗത കമ്മീഷണര്‍ക്ക് കത്തയച്ചിരുന്നു . സുപ്രീംകോടതി ഉത്തരവിനെ തുടര്‍ന്നായിരുന്നു നിര്‍ദ്ദേശം.

ഇരുചക്രവാഹനങ്ങളിലെ പിന്‍സീറ്റ് യാത്രികര്‍ക്ക് ഹെല്‍മറ്റും കാറുകള്‍ ഉള്‍പ്പെടെയുള്ള വാഹനങ്ങളിലെ പിന്‍സീറ്റ് യാത്രികര്‍ക്ക് സീറ്റ് ബെല്‍റ്റും നിര്‍ബന്ധമാക്കിയിട്ടുള്ളതാണ് . എന്നാല്‍ , കേരളത്തില്‍ ഇത് പൂര്‍ണമായും നടപ്പിലാക്കിയിരുന്നില്ല.

അപകടങ്ങള്‍ വര്‍ധിക്കുന്നതിനു പിന്നാലെ ഇക്കാര്യം നിയമലംഘനമായി കണക്കാക്കി ഇന്‍‍ഷുറന്‍സ് കമ്പനികള്‍ നഷ്‍ടപരിഹാരം നല്‍കില്ലെന്ന നിലപാട് കൈക്കൊണ്ടതോടെ നിയമം കര്‍ശനമാക്കാന്‍ ഗതാഗതവകുപ്പ് ശ്രമം തുടങ്ങുകയായിരുന്നു. തീരുമാനം ധൃതിയില്‍ നടപ്പിലാക്കിയാല്‍ പ്രതിഷേധത്തിന് ഇടയാകുമെന്ന കാരണത്താല്‍ ആദ്യഘട്ടത്തില്‍ ബോധവത്കരണം നടത്താനാണ് നിലവിലത്തെ തീരുമാനം.